Молк

14. 04 2008

Кажете ми една тајна
За да молчам.
И ќе молчам.
Ќе молчам како што молчи излитен покрив
за својата портокалова болка.
 

Зборувајте ми,
Без страв дека ќе ви проговорам назад.
Зборовите се звуци во такт и јасност
Зборовите не се деца мои
Не знам како за нив да се грижам
Па ќе молчам за вашиот театар.
Ќе молчам како што молчи сандак од ефтино дрво
за старечките таги на станарот свој.
 

Истурете ги во мене
Половина, две или утрешни неколку
И верувајте ми дека ќе молчам.
Бидејќи немам друго,
Јас сум само молк на еден пластичен невен.